Mit ganz viu nöiiä Spielerinnä, aber o es paar «autä Hasä» si mir i di Saisonvorbereitig gstartet. Das sehr unterschiedlichä Niveau het d Trainingsplanig für üs Trainerinnä nid grad eifach gmacht. Aus ersts hei mir ar Technik gschaffet; das isch o für di bishärigä Spielerinnä ä gueti Repetition gsi. U dases für niemer längwilig wird, hei mir no wöuä es nöis Spielsystem iifüehrä. Das isch am Afang sehr chaotisch gsi u niemer het genau gwüsst, woner ufem Fäld muess stah u wi di Loufwägä usgseh. O im letschte Training vorem VBC-Turnier isch no es zimlichs Chaos ufem Fäld gsi, d Chöpf vo dä Spielerinnä hei grouchnet u mir hei numä Fragezeichä i ihrnä Ougä gseh. Umso überraschter u zimlich stolz si mir de überä Uftritt am Turnier gsi. Plötzlich hets einigermassä guet funktioniert, aui hei enang gholfä u füränand kämpft.
Mir fröiä üs u si gspannt uf di kommendi Saison.